ರಜಿನಿಕಾಂತ್‌ ‘ಜೈಲರ್ -2’ ಅಧಿಕೃತ ಅನೌನ್ಸ್‌
ಅಧಿಕೃತವಾಗಿ ‘ಜೈಲರ್ -2’ ಖಚಿತಪಡಿಸಿದ ಚಿತ್ರತಂಡ
‘ಟೈಗರ್‌ ಕಾ ಹುಕುಂ…’ ಎನ್ನುತ್ತಲೇ ಮಿಂಚಿದ ತಲೈವಾ
‘ಮಕರ ಸಂಕ್ರಾಂತಿ’ಯಂದು ರಜಿನಿ ಅಭಿಮಾನಿಗಳಿಗೆ ಗುಡ್‌ ನ್ಯೂಸ್‌
2023ರಲ್ಲಿ ತೆರೆಗೆ ಬಂದಿದ್ದ ಸೂಪರ್‌ ಸ್ಟಾರ್‌ ರಜಿನಿಕಾಂತ್‌ ಅಭಿನಯದ ‘ಜೈಲರ್’ ಸಿನೆಮಾ ಕಾಲಿವುಡ್‌ನಲ್ಲಿ ಸೂಪರ್‌ ಹಿಟ್‌ ಆಗಿದ್ದು ಅನೇಕರಿಗೆ ಗೊತ್ತಿರಬಹುದು. ರಜಿನಿಕಾಂತ್‌ ನಿವೃತ್ತ ಪೊಲೀಸ್‌ ಅಧಿಕಾರಿಯಾಗಿ ಮಾಸ್‌ ಅವತಾರದಲ್ಲಿ ಮಿಂಚಿದ್ದ’ಜೈಲರ್’ 2023ರಲ್ಲಿ ಕಾಲಿವುಡ್‌ ಬಾಕ್ಸಾಫೀಸ್‌ನಲ್ಲಿ ಭರ್ಜರಿ ಕಲೆಕ್ಷನ್‌ ಮಾಡಿದ ಸಿನೆಮಾಗಳ ಪೈಕಿ ಮುಂಚೂಣಿಯಲ್ಲಿತ್ತು. ‘ಜೈಲರ್’ ಸಿನೆಮಾ ಸೂಪರ್‌ ಹಿಟ್‌ ಆದ ಬಳಿಕ ‘ಜೈಲರ್-2’ ಸಿನೆಮಾ ತೆರೆಗೆ ಬರಲಿದೆ ಎಂದು ಹೇಳಲಾಗಿತ್ತಾದರೂ, ಚಿತ್ರತಂಡವಾಗಲಿ ಅಥವಾ ರಜಿನಿ ಅವರಾಗಲಿ, ಈ ಬಗ್ಗೆ ಎಲ್ಲಿಯೂ ಮಾತನಾಡಿರಲಿಲ್ಲ. ಇದೀಗ ‘ಮಕರ ಸಂಕ್ರಾಂತಿ’ ಹಬ್ಬದ ಸಂದರ್ಭದಲ್ಲಿಯೇ ‘ಜೈಲರ್-2’ ಸಿನೆಮಾದ ಬಗ್ಗೆ ಅಧಿಕೃತ ಘೋಷಣೆಯಾಗಿದೆ.
ರಜಿನಿ ಮೇನಿಯಾ ‘ಜೈಲರ್-2’ನಲ್ಲಿ ಮುಂದುವರೆಯಲಿದೆ …
2023ರಲ್ಲಿ ತೆರೆಕಂಡಿದ್ದ ‘ಜೈಲರ್’ ಸಿನೆಮಾದಲ್ಲಿ ರಜಿನಿಕಾಂತ್‌ ಅಭಿನಯ, ಪಾತ್ರವರ್ಗ, ಮ್ಯೂಸಿಕ್‌, ಕಥೆ, ನಿರೂಪಣೆ, ಮೇಕಿಂಗ್‌ ಹೀಗೆ ಎಲ್ಲಾ ವಿಭಾಗಗಳಲ್ಲೂ ಸೂಪರ್‌ ಎನಿಸಿಕೊಂಡಿತ್ತು. ‘ಜೈಲರ್’ ಸಿನೆಮಾ ನೋಡಿದ ಪ್ರೇಕ್ಷಕರು ಕೂಡ ಸಿನೆಮಾಕ್ಕೆ ಫುಲ್‌ ಮಾರ್ಕ್ಸ್‌ ನೀಡಿ, ಸೂಪರ್‌ ಹಿಟ್‌ ಮಾಡಿದ್ದರು. ತಮ್ಮ ನೆಚ್ಚಿನ ‘ತಲೈವಾ’ನ ಸಿನೆಮಾ ನೋಡಿ ಅಭಿಮಾನಿಗಳೂ ರಜಿನಿಗೆ ಜೈಕಾರ ಹಾಕಿದ್ದರು. ‘ಜೈಲರ್’ ಹಿಟ್‌ ಲಿಸ್ಟ್‌ಗೆ ಸೇರಿದ ಕೆಲವೇ ತಿಂಗಳಿನಲ್ಲಿ ಚಿತ್ರದ ಸೀಕ್ವೆಲ್‌ ಬರಲಿದೆ ಎನ್ನುವ ಮಾತುಗಳು ಕಾಲಿವುಡ್‌ನಲ್ಲಿ ಹರಿದಾಡಿತ್ತು. ಇದೀಗ ‘ಮಕರ ಸಂಕ್ರಾಂತಿ’ ಹಬ್ಬಕ್ಕೆ ನಿರ್ದೇಶಕ ನೆಲ್ಸನ್ ದಿಲೀಪ್‌ ಕುಮಾರ್‌ ‘ಜೈಲರ್ -2’ ಸಿನೆಮಾವನ್ನು ಅಧಿಕೃತವಾಗಿ ಅನೌನ್ಸ್‌ ಮಾಡಿದ್ದಾರೆ.
ಟೀಸರ್‌ನಲ್ಲಿ ‘ಜೈಲರ್-2’ ಅನೌನ್ಸ್‌
ಇನ್ನು ಅಧಿಕೃತವಾಗಿ ಘೋಷಣೆಯಾಗಿರುವ ‘ಜೈಲರ್-2’ ಸಿನೆಮಾದ ಟೀಸರ್‌ನಲ್ಲಿ ನಿರ್ದೇಶಕ ನೆಲ್ಸನ್ ಮತ್ತು ಸಂಗೀತ ನಿರ್ದೇಶಕ ಅನಿರುದ್ಧ್ ಗೋವಾದ ಬೀಚ್‌ ಬದಿಯ ಮನೆಯೊಂದರಲ್ಲಿ ಕೂತು ಸಿನೆಮಾದ ಬಗ್ಗೆ ಮಾತನಾಡುತ್ತ ಇರುತ್ತಾರೆ. ಇದೇ ಸಮಯದಲ್ಲಿ ‘ಟೈಗರ್‌ ಮುತ್ತುವೇಲ್ ಪಾಂಡಿಯನ್’ ಫೈಟ್‌ ಸೀನ್‌ ಶುರುವಾಗುತ್ತದೆ.
ತನ್ನ ತಂಟೆಗೆ ಬಂದವರನ್ನು ಮಚ್ಚು, ಗನ್‌, ಬಾಂಬ್‌ನಿಂದ ಉಡೀಸ್‌ ಮಾಡುವ ರಕ್ತಸಿಕ್ತ ದೃಶ್ಯವನ್ನು ಟೀಸರ್‌ನಲ್ಲಿ ತೋರಿಸಲಾಗಿದೆ. ಎಷ್ಟೇ ಜನ ಬಂದರೂ ತಾನೊಬ್ಬನ್ನೇ ಸಾಕು ಎನ್ನುವ ‘ಮುತ್ತುವೇಲ್ ಪಾಂಡಿಯನ್’ ಗತ್ತು – ಗರ್ವ ಟೀಸರ್‌ನಲ್ಲಿ ಹೈಲೈಟ್‌ ಆಗಿದೆ. ರಜಿನಿ ‘ಮುತ್ತುವೇಲ್ ಪಾಂಡಿಯನ್’ ಆಗಿ ಔಟ್ ಅಂಡ್‌ ಔಟ್ ಮಾಸ್‌ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ.
ಈ ವರ್ಷಾಂತ್ಯಕ್ಕೆ ‘ಜೈಲರ್’ ಸೆಟ್ಟೇರುವ ಸಾಧ್ಯತೆ!
‘ಜೈಲರ್’ ನಲ್ಲಿದ್ದ ಮ್ಯೂಸಿಕ್‌ ಹಾಗೂ ಬಿಜಿಎಂ ‘ಜೈಲರ್ -2’ ಅನೌನ್ಸ್‌ಮೆಂಟ್ ನಲ್ಲೂ ಹಾಕಲಾಗಿದೆ. ‘ಟೈಗರ್‌ ಕಾ ಹುಕುಂ’ ಎನ್ನುತ್ತಾ ರಜಿನಿ ಮಿಂಚಿದ್ದಾರೆ. ರಜಿನಿಕಾಂತ್‌ ಅವರನ್ನು ನೋಡಿ ಫ್ಯಾನ್ಸ್‌ಗಳು ಥ್ರಿಲ್‌ ಆಗಿದ್ದಾರೆ. ಅನೌನ್ಸ್‌ ಮೆಂಟ್‌ ಟೀಸರ್‌ ಸೋಶಿಯಲ್‌ ಮೀಡಿಯಾದಲ್ಲಿ ಭಾರೀ ಸದ್ದು ಮಾಡುತ್ತಿದೆ. ಕಲಾನಿಧಿ ಮಾರನ್ ಅವರ ‘ಸನ್ ಪಿಕ್ಚರ್ಸ್’ ಚಿತ್ರಕ್ಕೆ ಬಂಡವಾಳ ಹಾಕಲಿದೆ. ಚಿತ್ರದ ಪಾತ್ರವರ್ಗದ ಬಗ್ಗೆ ಯಾವ ಮಾಹಿತಿಯೂ ಹೊರಬಿದ್ದಿಲ್ಲ. ‘ಜೈಲರ್’ ನಲ್ಲಿ ಶಿವರಾಜಕುಮಾರ್, ಮೋಹನ್ ಲಾಲ್ ಮತ್ತು ಜಾಕಿ ಶ್ರಾಫ್ ಮುಂತಾದ ದಿಗ್ಗಜ ನಟರು ಕಾಣಿಸಿಕೊಂಡಿದ್ದರು. ಸೀಕ್ವೆಲ್‌ನಲ್ಲಿ ಯಾರೆಲ್ಲ ಇರಲಿದ್ದಾರೆ ಎನ್ನುವುದು ಮುಂದಿನ ದಿನಗಳಲ್ಲಿ ಗೊತ್ತಾಗಲಿದೆ. ಸದ್ಯ ರಜಿನಿಕಾಂತ್‌ ‘ವೆಟ್ಟೈಯನ್‌’ ಬಳಿ ಲೋಕೇಶ್‌ ಕನಕರಾಜ್‌ ಅವರ ‘ಕೂಲಿ’ ಸಿನೆಮಾದಲ್ಲಿ ಬ್ಯುಸಿಯಾಗಿದ್ದಾರೆ. ಈ ಚಿತ್ರದ ಬಳಿಕ ‘ಜೈಲರ್ -2’ ಸೆಟ್ಟೇರುವ ಸಾಧ್ಯತೆಯಿದೆ.
